رحلتي الى كندا Canada - 6 days

[عبد العزيز الكعبي]

السلام عليكم..

قبل كم اسبوع انا والشباب فكرنا نزور كندا بعد نهايه الترم..

وطلعنا الفيز من القنصليه الكنديه في مدينه نيوويورك اجراءاتها سهله و واضحه وكتبت موضوع عنها في بوابه امريكا..

وبعد نهايه الترم مشينا الى الاراضي الكندية و زرت مونتريال و تورونتو و بكره ان شاء الله بروح الى شلالات نياجرا و بنام ليله هناك و نرجع الى نيويورك سيتي.

رحلتي قصيره وصعب اني ازور اكثر الاماكن خصوصا في تورونتو لانها كبيره. مهوب مثل الكيوت مونتريال.

صورت كم صوره ان شاء الله بحطها وبكتب عن الشوارع و الاماكن الي رحت لها. وراح اتكلم عن وش صار لنا على الحدود...

بكتب عن اول يوم للرحله..

May 13 2008

قمنا الصبح على الساعه 10 تقريبا و رتبينا اغراضنا "دايم ارتب شنتطي في اخر لحظة" و حطينا الشنط في السياره و بنمر صاحبها ساكن في نيوجيرسي وعلى الساعه 12 واحنا ماسكين الخط.

الطريق مدته تقريبا 6 ساعات ونص نمر من جنب عاصمه ولايه نيويورك مدينه Albany و على بارك اسمه
Adirondack Park

اول شي وقفنا عنده مطعم Ihop



IHOP

الفطور لذيذ فيه بانكيك و اومليت و وافل وساندويشات المنيو حقهم فيه اشياء كثيره. وبعد ما افطرنا مشينا كم ساعه وقفنا علشان نصحصح شوي و شرينا من ستار بكس.



الحلو ان الطريقه فيه كل 30 مايل تقريبا منطقه خدمات فيها مطاعم و بنزين و مرات انترنت لاسلكي مجاني.

واحنا بنص الطريق و بين الخضار و البحيرات والانهار العيال مسكت معهم يبون يعسلون



انا شخصيا ما احب اوقف في الطريق خصوصا لمن يكون الطريق طويل شوي لان بنتعب اخر الرحله و الشي الثاني احب امشي بالنهار لان بالليل ما اشوف شي و يصير ممل.

وفي اللوح مكتوب اننا قربنا من بحيره اسمها

Lake George

Lake George - Plan Your Visit Before You Go at LakeGeorge.com

البحيره فيها مجموعه من المنتجعات و الفنادق وبنفس الوقت في اكتفتي الواحد يقدر يسويها والظاهر ان موسمها يكون بالصيف.





جلسنا ندور مكان نقدر نجلس فيه ولكن ما لقينا وبنفس الوقت العيال غيروا رايهم وقالوا نكمل الطريق و يمكن نلاقي شي قدام.

استمرينا بالطريق الين وصلنا الحدود الامريكيه مدينه Champlain, NY

و كان معنا قائمة بمكاتب الجوازات الي نسوي منها خروج بحكم اننا مسوين تسجيل خاص. و على العنوان المكتوب بالورقه ما في شي و من سوء حظنا كان في شرطه واقفين مع ناس عندهم مشكله. قلنا ازين شي نسال الشرطي وين عنوان المكتب اكيد انه يعرف وياليتنا ما سالناه جا السياره وطلب جوازاتنا و اوراقنا و خلانا ننتظر تقريبا ساعه كان يسوي فيها اتصالات المهم قلنا لازم نصبر ولا نتنرفز علشان ما يطولها معنا. و في الاخير قال خذوا اوراقكم و المكتب تلاقونه نهايه الطريق.

نزلنا المكتب و اجراءات الخروج سهله و نطلع ندور خوينا الرابع ما دخل معنا المكتب لان معها جنسيه امريكيه يمين يسار ما نشوف السياره نتصل عليه وينك يقولنا !!!

انا دخلت كندا والحل واحنا وش نسوي سوي قالنا تعالوا مشي ونجلس نمشي ما ادري كم متر و نروح للموظفه الي سوت له دخول لانه علمها عن موضوعنا و الحمد لله سالتنا مع مين جايين وين بتسكنون والغرض من الزياره و كم يوم بتجلسون. وفي الاخير طلبت مننا ندخل مكتب علشان نكمل اجراءات الدخول. كان تعاملهم ممتاز و ما طولنا.

الحلو لمن وصلنا لخوينا كانوا قد فتشوا السياره و كسبنا وقت وسالنا وراك تركتنا !! قالنا كنت ابي انتظركم وجاه واحد من موظفين الجوازات الامريكيه قاله ممنوع تنتظر اما انك تروح كندا ولا ترجع امريكا. كان يقولها باسلوب منرفز وخوينا ما حاول يطولها معه خايف انهم يعقدون اجراءاتنا "احنا السعوديين"زياده. قدخل كندا بدونا.


الطريق بين الحدود و مدينه مونريال تقريبا ساعه.

Montreal



Traveller | Tourism Montreal


* الصوره من الانترنت

اول ما دخلنا ولايه Quebec الكنديه تقريبا في اشيا تغيرت عن امريكا اللوح صارت باللغه الفرنسيه المسافات صارت بالكيلو "انا كنت احسب ان امريكا و كندا يتخدمون نفس الوحدات الطول و الوزن و درجه الحراره" حتى البنزين يحسبونه باللتير"

وصلنا الفندق


Doubletree by Hilton Montreal Centre-Ville - Montreal hotel, Montreal hotels, Downtown Montreal Hotel, Downtown Montreal Hotels

الفندق كان 3 نجوم و سعره معقول جدا لاننا حجزنا عن طريق موقع الهوت واير



Hotwire.com: Discount airfare, hotel reservations, car rentals, vacation packages and cruises

انا اخترت المنطقه وعدد النجوم و كان الفندق هذا موجود و سعره ليلتين ب 150 دولار فقط و لمن حطيت معلومات الكريديت كارد طلع لي الفندق هذا. اختيارنا للفندق هذا علشان السعر مناسب و الموقع و لانه 3 نجوم بيكون معقول لرحله شباب. لمن شيكت على سعر الفندق لو حجزته مباشره لقيته اكثر من 130 دولار لليله الوحده



الفندق كان نظيف و خدمته ممتازه و الموظفيين كانوا متعاونين معنا خصوصا الاستقبال في سوريه و مغربيه كانوا يعلموني عن مطاعم و اهم الاشياء الي ازورها. و جنبه محطه ميترو.

دخلنا الغرفه وريحنا شوي و غيرنا شوي و بعدها طلعنا للداون تاون وتمشينا في شارع rue Crescent هذا فيه مجموعه من المطاعم و مشينا لشارع موزاي له اسمه
rue Mackay
كان فيه مطعم عربي اسمه الدار فيه جلسه خارجيه و داخليه الخارجيه كانت ملينا جلسنا جوه تعشينا مشاوي ولكن كانت عاديه جدا. وبعدها عسلوا الشباب و رجعنا الفندق.

وبكذا خلصنا اول يوم لنا في مونتريال..


اليوم الثاني

May 14 2008

قمنا من النوم و استعدينا علشان نشوف مونتريال كنا مخططين نزور اهم الاشياء اول حاجه.

بدينا رحلتنا في اهم شارع تجاري في المدينه

Rue Sainte-Catherine



الشارع مليان محلات ومطاعم و قهاوي والي يحب السوق بينبسط فيه لان المحلات على الشارع و في المجمعات وبنفس الوقت تحت الارض. المجمعات مشبوكه على بعض تحت الارض يعني ما يحتاج تطلع للشارع.



الظاهر ان كندا متديينين شوي كثيره الكنايس عندهم.






و في فرقه تغني وتبيع سيدي يسترزقون

[IMG][/IMG]

وعلى نفس الشارع موجود ساحه فيليبس ..





مثل ما قلت ان الشارع هذا بالداون تاون فيه مجمعات تجاريه بس ماحفظت اسمها محلات ومطاعم وقهاوي وبنفس الوقت الشوارع الي تقطعه فيها مطاعم و قهاوي و تفتح بالليل.

ٌRue Crescent

Rue St-Denis


وكنا ناوي نتغدى في مطعم الباشا موجود لقيته في مجمعين ولكن غيرنا راينا وقلنا نتغدى في مونتريال القديمه.. وان شاء الله بخط صورها قريب

[عبد العزيز الكعبي]

تكمله ...

May 14 2008

بعد ما تمشينا في شارع Rue Sainte-Catherine قررنا نروح ل

Old Montreal

المنطقه هذي فيها سواح كثير لان فيها مجموعه من المباني القديمه و الكنايس وقهاوي ومطاعم وبنفس الوقت قريبه من الواجهه المائيه للمدينه.

هذي ساحه بالنص فيها مطاعم وقهاوي

اسعار المطاعم هنا اغلى من فروعها في المحلات الثانيه والسبب انها سياحيه.

عجبني هالمجسم

هذي صوره للمشى على النهر.

كنيسه Notre-Dame

صور داخل الكنيسه

* من الانترنت

اخر صوره تعيجزت الفها خليتها مايله. "لف راسك او شاشه الكمبيوتر"

للحين اليوم الثاني ما انتهى ...

تكمله ...

May 14 2008

بعد ما تغدينا في الولد منتريال مرينا بالصدفه على شاينا تاون لان ما في حرص عليهم

Chinatown

وكانت وجهتنا الى

Parc Mont-Royal

حديقة على جبل و حلو المنظر منها على المدينه في منطقتين يقدر الواحد يوقف فيها. وفي بحيره فوق الجبل الجو و المنظر كانوا

وبعد ما تمشينا في البارك شوي قررنا نرجع الفندق نريح علشان نطلع بالليل..

ولكن قبل ما نروح الفندق مرينا محل رياضه علشان نشتري مايوهات نبي نسبح في الفندق. الحلو ان فنادق كندا المسابح تكون مغلقه و المويه دافيه.

شرينا المايوهات ولكن ما سبحنا بفندق مونتريال تعيجزنا.

بعد ما ارتحنا بالفندق كان عندنا كان عندنا كذا شارع فيها نايب لايف وحركه بالليل قلنا نروح نتمشى فيها.

كان احسنهم

Boulevard St-Laurent

وفي شارع يقطعه حلو حق مشات بس ولكن مهوب طويل اسمه Rue Prince-Arthur Est

العيال اكلوا بيتزا من محل واحد تونسي وبعدها رحنا الى

Casino de Montréal

كازينو مونتريال

* من الانترنت

[عبد العزيز الكعبي]

الي شدنا لزياره الكازينو المبنى خصوصا التصميم الخارجي..

ولمن طلعنا من الكازينو رحنا الى ماكدونلز مع انه مكتوب مفتوح 24 ساعه ولكن في الاخير اكلنا في مطعم عربي جنبه على شارع Rue St-Denis الشارع هذا فيه قهاوي تفتح بالليل وحركه. ولكن بالليل العالم تسكر لان في بارات.

كذا تقريبا انتهت رحلتي الى مونتريال لان اليوم الثالث مشينا الى تورونتو .. في اشياء يقدر الواحد يزورها ما رحنا لها اما لانها ما تعجبنا او لان ما في وقت.

وان شاء الله برجع ازورها ثانيه قريب..



اليوم الثالث ..

May 15 2008

قمنا الصبح و رتبنا اغراضنا و كان عندي واجب لازم اسلمه يوم 15 انا و واحد من اخوياي نزلت في اللوبي و رتبت الواجب وارسلته للدكتور الله يستر للحين ما طلعت النتيجة .. المهم ما علينا ركبنا السياره متجهين الى تورونتو الطريق بالسياره تقريبا 5 ساعات ونص.

الطريق كان ممتع بالنهار نشوف البحيره والنهر و الزرع ..





و بعدين وقفنا نتغدى في كنتاكي بنص الخط و بعد ما مشينا قلت للعيال اوووووووووه خل نرجع لكنتاكي قالي ليش قلت نسيت اصوره وبالمنتدى يصورون كل شي. بغيت انجلد .. قلت بعوضهم بصوره لكاس كنتاكي ..



و صلنا تورونتو المغرب تقريبا ..

Toronto


الفندق كان كراون بلاز بس بعيد شوي عن الداون تاون و سعره بعد ممتاز تقريبا 150 دولار الليلتين طبعا هالسعر لاني حاجزه من الهوت واير. الفندق كان مستواه عادي جدا ولكن ريحه الغرفه تعبانه لاننا في دور المدخنيين.

ارتحنا بالغرفه شوي و نشيك على الانترنت و الايميل الا واحد من اخوياي يصارخ يقول جبت A ماشاء الله. عاد كان وقتها مبسوط و واحد من العيال قاله اجل العشاء عليك وهو من الفرحه قال خلاص علي العشاء. انا قبلها كنت في اللوبي وشفت اعلان لمطعم و كنت مشتهيه لمن قال بعزمكم على طول قلت له خلنا نروح

Hard Rock





المطعم موقعه ممتاز و خدمتهم حلوه بس عيبه كان فاضي يمكن احنا جينا متأخرين شوي وطلبت ستيك وحركات "ما اطلبه الا بالمناسبات" وبعدها اخذنا لنا كم صوره في

Dundas Square





اعجبتني دعايه الحلاو حاطينا وجنبها ناس فاتحين القراطيس..



المطعم والساحه على شارع

Yonge st

و مقابل المطعم في سوق كبير بس للاسف ما رحنا له اسمه

Eaton Center

Toronto Eaton Centre

و لمن خلصنا تصوير جلسنا نتمشى بالسياره في الدوان تاون و رجعنا الفندق علشان نرتاح وننام ..


اليوم الرابع ..

May 16 2008

قمنا الصبح تقريبا الساعه 10 علشان نروح الملاهي. اول ما طلعنا من الفندق عبينا بنزين و كان جنب المحطه مطعم اسمه وقت القهوه



افطرنا ساندويش تونا و عصير و بعدها رحنا للملاهي

Canada's Wonderland



Canada's Wonderland | Canada's Premier Themed Amusement Park (Toronto)

وكان في لعبه جديده لعام 2008 اسمها

Behemoth Roller Coaster

وهذا فيديو للعبه في اليوتيوب للي يحب يشوفها ..

YouTube - Behemoth Roller Coaster - Canada's Wonderland 2008



ما صورت داخل الملاهي لاني ما احب انزل الكاميرا "مهوب فاضي اصور" انبسطنا فيها تقريبا من الساعه 12 الى الساعه 5 تعبوا الشباب من الملاهي وطلعنا الفندق ارحنا شوي وتسبحوا في المسبح وبعدها واحد من العيال حس بتعب شوي قال ما راح اطلع. احنا طلعنا للداون تاون و تغشينا في مطعم ليلى. المطعم عادي جدا جدا جدا و خدمته تعبانه ما انصح احد يروح له.




و تمشينا في الشارع الي فيه المطعم وكان في واحد فنان يحط الحجر فوق بعض. صورته بالجوال ان شاء الله بحاول انزلها على الكمبيوتر و احطها بالمنتدى.

وبعدها تمشينا بالسياره في الداون تاون ورجعنا الفندق ننام ..



اليوم الخامس ..

May 17 2008

قمنا من النوم على الساعه 10 ونص رتبنا اغراضنا علشان نسوي شيك اوت وعلى الساعه 12 احنا جاهزين بحكم يوم كامل راح علينا في الملاهي قلنا نجلس في تورونتو الى العصر و نكمل رحلتنا. رحنا الى اعلى برج في العالم لمده اكثر من 30 سنه .. الحين برج دبي الاعلى

CN Tower

http://www.cntower.ca



وهذي الصوره من وايكيبيدايا توضح برج دبي مع برج تورونتو



اسعار تذاكر البرج تختلف على حسب الاشيا الي تبي تشوفها تبدا تقريبا من 23 دولار.





وهذي بعض الصور الي صورتها من البرج

المنطقه الماليه ..



مطار صغير عباره عن جزيره بس الظاهر انه مهوب تجاري ما فيه رحلات طيران تجارية.



في المستوى الاول للبرج فيه منطقه الارضيه قزاز و تشوفون العالم تطامر و تتسدح علشان تتصور



وبعدين طلعنا الى منطقه اعلى اسمها Sky pod



واخر شي نزلنا تمشينا بالمحل حق البرج



بعض المباني الي جنب البرج ..



Rogers Center

[عبد العزيز الكعبي]

المميز في الملعب ان السقف ينفتح ويتقفل..






بعد ما طلعنا كنا جوعانين ناس قالوا نبي نروح للمجمع ناكل فيه و ناس قالوا نبي مطعم عربي اسمه غزالي في وحده كاتبه عنه في المنتدى و في الاخير رحنا غزالي .. وطريق المطعم لازم نمر الشاينا تاون ..



مطعم غزالي اللبناني



المطعم اكله زين و نظيف بس ما فيه جلسات ما في الا 4 كراسي ..

ونفس الشارع مطعم ليلي خدمته تعبانه.



وبعد ما تغدينا قررنا نمشي الى اخر مدينه وهي نياجرا فولس ..






تكمله اليوم الخامس ..

May 17 2008

بعد ما مسكنا الطريق وصلنا خلال ساعه ونص و اتجهنا الى الفندق الي حجزناه



واحد من العيال مشترك بعضويه الهيلتون وكان عنده نقاط و حجزه لنا بالنقاط. ذلنا بالطريق كله علشان الفندق "طبعا كان يمزح"

دخلنا الفندق ارتحنا شوي وعلى طول طلعنا علشان نلحق نشوف الشلالات في النهار..

هذا الفندق مقابلنا موقعه استراتيجي و فيه مجمع تجاري و كازينو



و مشينا لين وصلنا الشلال مهوب بعيد عنا تقريبا 4 دقايق مشي او اقل..



وهذي صور لشلالات



يا ملحها ياناس. كان في عرسان توهم متزوجين ومعهم البنت





صوره لمطعم على الشارع الي مقابل الشلالات و صوره البرج مهوب جنب بعض



صوره للشلال ومقابله رحله بالقارب تقريبا ب 15 دولار الرحلات من الطرف الكندي و الامريكي



الصوره الجايه لشلال يسمونها us falls لانها تنزل من الجانب الامريكي و الجسر هذا الي يربط امريكا وكندا و الي مشينا فيه لمن رجعنا لامريكا. اسمه جسر قوس قزح



مجموعه من الفنادق الي تطل على الشلال



صوره للشلال رهيبه ..









يمين امريكا و يسار كندا





و بعدها رجعنا الفندق ارتحنا شوي و في الليل نزلنا نتمشى ..

وكان جنب الفندق في مطعم برازيلي بس للاسف ما كنا مشتهين ناكل بس شكل الاكل حلوو



و رحنا للشلالات بالليل نبي نشوفها مع الانور - للاسف الصوره مهيب واضحه.



ومشينا لين شارع اسمه Clifton hill

في مطاعم ومعارض و العاب حلو بالليل فيه حركه ..

الموقع فيه بعض الصور و الاشياء الي ممكن تزورونها في نفس الشارع.

Clifton Hill in Niagara Falls Ontario



و بعد ما تعشينا رجعنا الفندق و نمنا استعداد للرجعه لنيويورك ..

الشلالات تكفيها ليله وحده بس اكثر من كذا بتملون.

اليوم السادس

May 18 2008

قمنا الصبح و سوينا شيك اوت و اتجهنا للجسر علشان نرجع امريكا الجسر كان زحمه يمكن لانه يوم الاحد و الناس راجعه و بنفس الوقت صادف انه لونج ويكد في كندا لمن وصلنا عند الجوازات طلب مننا اننا نوقف و ندخل المبنى دخلنا لقينا الناس تنتظر في ناس اكثر من ساعه و في اثنين من المانيا الموظف يقولهم الظاهر ان جوازتكم ضاعت و في مكسيكي نفس الشي صار له الوضع كان حوسه شوي لبعض الناس اما احنا حظنا كان حلو خلال ساعه خلصنا كل الاجراءات و اعطونا جوازتنا و دخنا امريكا. سبب الخربطه الي صارت ان الجوازات نشبت في الانبوب الي بين مكتب الموظف الي ياخذ الجوازات واحنا بالسياره و الموظف الي داخل المبنى. في جهاز يحطون فيه الاوراق والجوازات في حافظة و منها يحطها في انبوب عن طريق الشفط تطير الحافظة الى المبنى و لكن تعلقت بعض الجوازات. وكلموا صيانه.


ولمن خلصنا من الجوازات تمشينا في الجانب الامريكي كان مرتب و الشارع بعيد عن الشلال مهوب مثل حق كندا ولكن الفنادق والمطاعم والحركه افضل في كندا.

هذي صوره للجانب الامريكي



و بعدها مشينا متجهين الى نيويورك الرحله كانت متعبه خصوصا تاخرنا بالمشي و دخل علينا الظلام و تعشينا في ولايه بنسلفينا ساندويش من بقاله مشهوره هنا اسمها واوا واحد مدحها و كان في محل بالطريق وجربنا الساندويش وكان مش بطال.


وبكذا انتهت رحلتنا الى كندا و ان شاء الله ازورها ثانيه و يكون عندي وقت اكثر واشوف الي ما شفته ..


منقول

[حجازية]

واو وربي تهبل الصور خاصة الشللالات الي نفسي ازورها يوم بس متى مدري

يوم الدفنه عتبانه عليكم ليش ماعديتو علي

وبالنسبه للمطاعم كيف اكلتو منها تظمنولحومها ان كان اكلتو فواكه وخيار افضل من مطاعمهم

يسلمو ع الموضوع الاكتر من رائع

.. تقبل مروري,,

[منفى الحرية( رغيف يابس)]

المكسيك كندا

[موسى السلمي]

اخر صوره تعيجزت الفها خليتها مايله. "لف راسك او شاشه الكمبيوتر"

يمين يسار آخر حل الف اللابتوب

رحلة جميلة ومناظر سياحية بمعنى الكلمة

مشكور أخي على الموضوع الذي فيه فائدة لمن اراد الذهاب الى كندا .

[سمراء الكنانة]

صور خلابة بلاشك

ومجهود مشكور عليه لإمتاعنا معك بتفاصيل الرحلة

// عبد العزيز الكعبى //

دعواتنا لك بالتوفيق والنجاح بإختباراتك

ورحلات سعيدة وسالمة لك مستقبلاً بإذن الله

مودتى لك